జ్ఞాపకాలు

జ్ఞాపకాలు

జ్ఞాపకాలు మిగులుతాయి చివరికి

వసంతం వెళిపోతూ వెళిపోతూ
గుప్పెడు పూలు రాల్చి పోతుంది

పరిమళం మాత్రం మిగులుతుంది చివరికి

బాటలు చీలే చోట బరువెక్కిన గుండెలు మూలుగుతాయి
వీడ్కోలు కౌగిలిని విడిపించుకోలేక
వేళ్ళు ఉద్విగ్నంగా చలిస్తాయి
కలసి నడిచిన అడుగుల్ని తలచుకుని కళ్ళు రెండు సముద్రాలవుతాయి

కలలు మాత్రం మిగులుతాయి చివరికి

తీరాన్ని వదలి పడవ దూరదేశాలకు ప్రయాణమౌతుంది
గాలిలో కోలాహలం క్రమంగా దూరమౌతుంది
ఒడ్డునున్న ఇసుక మీద ఒంటరితనం దీనంగా నిలబడుతుంది

సముద్రపు హోరు మాత్రం మిగులుతుంది చివరికి

పచ్చని చెట్ల గుబుర్లలోంచి పక్షి ఎగిరిపోతుంది
పాట మాత్రం మిగులుతుంది చివరికి

జ్ఞాపకాలు మిగులుతాయి చివరికి



భానుమూర్తి (1984)