Friday, September 26, 2008

ఆశయాల చిటారు కొమ్మన వెలిగే కాంతి పుష్పం స్వప్నం
సత్యం చేయడానికి సాహసం కావాలి
పరచుకున్న అనేకానేక మరణాల్ని నిలబెట్టి
ఒక జీవితం చెయ్యడానికి సాహసం కావాలి

సంశయ సముద్ర కల్లోలం లో నమ్మకాల నౌక భగ్నమైనప్పుడు
కడ దాకా ఈదే రెక్కల సాహసం కావాలి
ఒకటొకటే రాలిపడే నక్షత్రాల్ని చూసి ఒంటరి ఆకాశం చీకటైనప్పుడు
ఒక ఉదయంగా వెలగడానికి సాహసం కావాలి

అదృశ్య ఖడ్గప్రహారాల మధ్య అజేయంగా నిలవడమే జీవితమైనప్పుడు
గాయాల్ని గౌరవించడానికి సాహసం కావాలి